CAROLINA URCERA MARTINS, GAÑADORA DO CONCURSO DE FOTOGRAFÍA “O XARDÍN BOTÁNICO DE LOURIZÁN”
O Centro de Investigación Forestal de Lourizán xa ten gañadora para o seu concurso de fotografía “O Xardín Botánico de Lourizán”. A imaxe presentada por Carolina Urcera Martins foi a elixida, destacando pola súa sensibilidade estética e a súa capacidade para capturar a esencia do xardín botánico.
O xurado tamén recoñeceu o talento de Iván de Rada e Guadalupe Teijeiro Ramos, quen foron seleccionados como finalistas do concurso.
Como premio, Carolina Urcera recibirá un lote de libros especializados e unha planta forestal, mentres que os finalistas serán obsequiados cunha planta como recoñecemento á súa participación e calidade fotográfica.
Con esta iniciativa, o Centro de Investigación Forestal de Lourizán busca poñer en valor a riqueza natural do xardín botánico e fomentar a conexión da cidadanía coa contorna forestal galega a través da arte e a fotografía.