As coleccións científicas do CIF de Lourizán constitúen un patrimonio de incalculable valor que recolle unha ampla mostra da biodiversidade de Galicia. O centro custodia o Herbario LOU, que conta con máis de 85.000 pregos de plantas vasculares, incluíndo a histórica colección do P. Baltasar Merino (base da Flora Descriptiva e Ilustrada de Galicia), así como as achegas de Manuel Laínz e Gómez Vigide. Este fondo complétase coa Micoteca LOU-Fungi, con 25.000 exemplares de fungos, e unha zooteca que alberga máis de 8.000 insectos de diferentes ordes, todas eles conservados en sistemas con control de humidade e temperatura para garantir a súa integridade científica.
O acceso a estas coleccións está estritamente restrinxido ao persoal investigador, técnicos e especialistas pertencentes a institucións científicas que xustifiquen un obxectivo de estudo concreto. A diferenza do Xardín Botánico, o herbario e as súas coleccións asociadas non están abertos ao público en xeral, co fin de preservar a seguridade dos exemplares. O centro ofrece servizos de consulta presencial e préstamo de pregos.