A.C. Rootstock

Orzamento: 132.247 €

Resumo: O CIF-Lourizán ten seleccionados 22 candidatos a portaenxertos, obtidos mediante mellora xenética, resistentes á tinta e con mellores adaptacións climáticas que os actuais portaenxertos comercializados, que presentan problemas na súa implantación no centro e interior de Galicia. No tempo en que estes materias completen o proceso de alta no Rexistro de Variedades Comerciais é imprescindible garantir que son totalmente compatibles ao enxerto, que a súa propagación vexetativa é altamente viable e procurar, na medida do posible, que sexan tolerantes ao cancro e a outras posibles afeccións do castiñeiro. Co obxectivo de trazar unha transferencia garantista destes produtos ao sector, nesta Acción de Cooperación (AC) proponse a avaliación comparativa das distintas técnicas de propagación vexetativa así como determinar a compatibilidade temperá mediante enxerto en verde e a incorporación sistematizada dunha novidosa técnica histolóxica para a predición de incompatibilidade tardía. Tamén se fará un seguimento sanitario deste material, avaliando o grao de tolerancia a determinados patóxenos e, finalmente, coa a cooperación da IXP-Castaña de Galicia, farase a instalación dunha parcela piloto que incorpore a selección final dos candidatos, enxertados coas variedades de maior interese comercial, o que permitirá corroborar in situ o bo comportamento deste material nunha zona produtiva de castiñeiros. 

A optimización nesta AC consiste, por tanto, en reducir os tempos de transferencia dos novos patróns híbridos, incrementando ao tempo a garantía da calidade do material e a súa utilidade para aportar solucións directas ao sector. Incorpóranse innovacións que radican no establecemento dunha técnica de predición temperá de compatibilidade ao enxerto en castiñeiro e no desenvolvemento final de novos produtos mellorados xenéticamente. Dito doutro xeito, unha vez aprobados os novos materias, os viveiros xa coñecerán o comportamento destes híbridos e poderán elixir os que mellor se adapten ao seu sistema de produción, e os produtores terán unha maior garantía de adaptabilidade climática, sanidade e compatibilidade ao enxerto que reducirá considerablemente as perdas que se producen actualmente por estes motivos, e que levan en ocasións á morte súbita de árbores xa ben formados.